អំពីគេហទំព័រអប់រំ www.saferoads.org.kh
ទំព័រអប់រំ www.saferoads.org.kh គឺជាផ្នែកមួយនៃយុទ្ធនាការអប់រំផ្សព្វផ្សាយជាសាធារណៈនៃ“គម្រោងមួកសុវត្ថិភាពមួយជួយជីវិតបានម្នាក់” ដែលមានគោលបំណងជំរុញការពាក់មួកសុវត្ថិភាពក្នុងចំណោមអ្នករួមដំណើរតាមទោចក្រយានយន្តព្រមទាំងកុមារនៅក្នុងប្រទេសកម្ពុជា។
“គម្រោងមួកសុវត្ថិភាពមួយជួយជីវិតបានម្នាក់” ត្រូវបានបង្កើតនិងដឹកនាំអនុវត្តដោយអង្គការមូលនិធិបង្ការរបួសអាស៊ីដោយបានសហការយ៉ាងជិតស្និទ្ធជាមួយគណៈកម្មាធិការជាតិសុវត្ថិភាពចរាចរណ៍ផ្លូវគោក និងអគ្គស្នងការដ្ឋាននគរបាលជាតិហើយបានទទួលការគាំទ្រថវិកាពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ(USAID)
និងម្ចាស់ជំនួយជាច្រើនទៀត។
អំពីអង្គការមូលនិធិបង្ការរបួស អាស៊ី
បេសកកម្មរបស់អង្គការមូលនិធិបង្ការរបួស អាស៊ី គឺផ្តល់ចំណេះដឹងនិងជំនាញអំពីសុវត្ថិភាពចរាចរណ៍ដើម្បីសង្គ្រោះជីវិត ដល់បណ្តាប្រទេសកំពុងអភិវឌ្ឍន៍ក្នុងគោលដៅបង្ការការស្លាប់ និងការរងរបួសក្បាលដោយគ្រោះថ្នាក់ចរាចរណ៍។
អង្គការមូលនិធិបង្ការរបួស អាស៊ី ធ្វើការក្នុងភាពជាដៃគូជាមួយរដ្ឋាភិបាលនិងសហគមន៍នៃបណ្តាប្រទេសនានាក្នុងពិភពលោកតាមរយៈវិធីសាស្ត្រចំបងចំនួនប្រាំ ដែលរួមមាន៖ ការអប់រំសិក្សា ការផ្សព្វផ្សាយដើម្បីការផ្លាស់ប្តូរ ការទាក់ទាញមតិដើម្បីការគាំទ្រ ការឧបត្ថម្ភមួកសុវត្ថិភាព និងការស្រាវជ្រាវនិងវាយតម្លៃ។
ទស្សនវិស័យ
ពិភពលោកមួយដែល៖
- ផ្លូវមានសុវត្ថិភាព មានអ្នកប្រើប្រាស់ផ្លូវដ៏ឆ្លាតវៃ និងបរិស្ថានសុវត្ថិភាពចរាចរណ៍បំរើដល់ប្រជាពលរដ្ឋនិងសេដ្ឋកិច្ចដែលកំពុងអភិវឌ្ឍន៍។
- វិស័យឯកជន រដ្ឋាភិបាល និងស្ថាប័នសាធារណៈមានការសហការគ្នាដើម្បីផ្លាស់ប្តូរវិស័យសុវត្ថិភាពចរាចរណ៍ប្រកបដោយប្រសិទ្ធភាព និងនិរន្តរភាព។
- ផ្តល់អំណាចនិងការអប់រំដល់ប្រជាពលរដ្ឋម្នាក់ៗដើម្បីអាចឲ្យពួកគេធ្វើការសម្រេចចិត្តប្រកបដោយបញ្ញាញាណអំពីសុវត្ថិភាពចរាចរណ៍និងសន្តិសុខពេលធ្វើដំណើរ ទាំងក្នុងនាមពួកគេជាអ្នកបើកបរឬអ្នករួមដំណើរ។
ឧបសគ្គ
ក្នុងឆ្នាំ២០១៣ គ្រោះថ្នាក់ចរាចរណ៍បានបណ្តាលឲ្យមនុស្ស១៩៦០នាក់ស្លាប់ និង១៤២២៧រងរបួសដែលធ្វើឲ្យខាតបង់ថវិកាប្រហែល៣៣៧លានដុល្លាសហរដ្ឋអាមេរិកគឺស្មើនឹង២,១ភាគរយនៃផលិតផលក្នុងស្រុកសរុប។
ក្នុងឆ្នាំដដែលនេះ ស្ទើរតែ៩០ភាគរយនៃយានយន្តដែលបានចុះបញ្ជីជាទោចក្រយានយន្ត ប៉ុន្តែការប្រើប្រាស់មួកសុវត្ថិភាពនៅតែមានកំរិតទាប។ របាយការណ៍របស់អង្គការសុខភាពពិភពលោកបានបង្ហាញថាមានត្រឹមតែ៦៥ភាគរយនៃអ្នកបើកបរ និង៩ភាគរយនៃអ្នករួមដំណើរតាមទោចក្រយានយន្តប៉ុណ្ណោះដែលពាក់មួកសុវត្ថិភាពនៅលើដងផ្លូវក្នុងប្រទេសកម្ពុជា។ ក្នុងឆ្នាំដដែលនេះដែរ ៦៩ភាគរយនៃអ្នកស្លាប់ដោយសារគ្រោះថ្នាក់ចរាចរណ៍គឺជាអ្នកប្រើប្រាស់ទោចក្រយានយន្ត ហើយ៦២ភាគរយនៃអ្នកស្លាប់ទាំងនោះបានរងការប៉ះទង្គិចក្បាល។
ទោះបីជាច្បាប់បានកំណត់ឲ្យអ្នកបើកបរទោចក្រយានយន្តពាក់មួកសុវត្ថិភាពជាយូរឆ្នាំហើយក៏ដោយ ក៏ទើបតែដើមឆ្នាំ២០១៤កន្លងទៅនេះច្បាប់ចរាចរណ៍ផ្លូវគោកថ្មីបានកំណត់ការពាក់មួកសុវត្ថិភាពសម្រាប់អ្នករួមដំណើរព្រមទាំងកុមារ។
គោលបំណង
ដើម្បីបង្កើនអត្រាពាក់មួកសុវត្ថិភាពក្នុងចំណោមអ្នករួមដំណើរតាមទោចក្រយានយន្ត ក្នុងរាជធានីភ្នំពេញ ខេត្តកណ្តាល និងខេត្តកំពង់ស្ពឺ ឲ្យបាន ៨០%នៅឆ្នាំ២០១៦។
កម្មវិធីការងាររបស់អង្គការមូលនិធិបង្ការរបួស អាស៊ី ប្រចាំប្រទេសកម្ពុជា
អង្គការមូលនិធិបង្ការរបួស អាស៊ី រដ្ឋាភិបាលនៃព្រះរាជាណាចក្រកម្ពុជា ដៃគូផ្នែកឯកជន និងអង្គការមិនមែនរដ្ឋាភិបាលបានចាប់ផ្តើមអនុវត្តកម្មវិធីមួកសុវត្ថិភាពជាថ្នាំបង្ការជីវិតសាកCHVI)នៅឆ្នាំ២០១០ ដោយមានកម្មវិធីការងារដូចខាងក្រោម៖
- កម្មវិធីអប់រំតាមគ្រឹះស្ថានអប់រំសិក្សា៖ បង្កើនកំរិតពាក់មួកសុវត្ថិភាពនៅតាមសាលារៀនគោលដៅដោយផ្តល់មួកសុវត្ថិភាពដោយឥតគិតថ្លៃ និងការបណ្តុះបណ្តាលអំពីសុវត្ថិភាពចរាចរណ៍ និងការពាក់មួកសុវត្ថិភាព
- កម្មវិធីផ្លាស់ប្តូរឥរិយាបថ៖ ផ្លាស់ប្តូរឥរិយាបថនៃការពាក់មួកសុវត្ថិភាពក្នុងចំណោមអ្នករួមដំណើរតាមរយៈប្រព័ន្ធផ្សព្វផ្សាយ យុទ្ធនាការអប់រំតាមដងផ្លូវ និងយុទ្ធនាការអប់រំតាមសហគមន៍
- កម្មវិធីលើកកម្ពស់បរិយាកាសអំណោយផល៖ គាំទ្រការអនុម័តនិងការអនុវត្តន៍ច្បាប់ដែលកំណត់ឲ្យអ្នករួមដំណើរតាមទោចក្រយានយន្តព្រមទាំងកុមារត្រូវតែពាក់មួកសុវត្ថិភាពតាមរយៈការធ្វើការរួមគ្នាជាមួយដៃគូ។