អង្គការមូលនិធិបង្ការរបួសអាស៊ី និងទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិសហការគ្នាដើម្បីរួមចំណែកជួយប្រទេសកម្ពុជាពីការខាតបង់ថវិការាប់លានដុល្លា
៖ អង្គការមូលនិធិបង្ការរបួស អាស៊ី (AIP Foundation) ដែលជាអង្គការមិនមែនរដ្ឋាភិបាល និងមិនស្វែងរកប្រាក់ចំណេញ បានទទួលការគាំទ្រជាមួលនិធិចំនួន ៦៣៥ ៩៩៣ ដុល្លាសហរដ្ឋអាមេរិកពីកម្មវិធី Development Innovation Ventures (DIV) របស់ទីភ្នាក់ងារសហរដ្ឋអាមេរិកដើម្បីការអភិវឌ្ឍន៍អន្តរជាតិ (USAID)។ ដោយមានការសហការគាំទ្រពីគណៈកម្មាការជាតិសុវត្ថិភាពចរាចរណ៍ ផ្លូវគោក និងក្រសួងមហាផ្ទៃ ជំនួយនេះនឹងផ្តល់លទ្ធភាពដល់អង្គការមូលនិធិបង្ការរបួស អាស៊ី អនុវត្តគម្រោង “មួកសុវត្ថិភាពមួយ ជួយជីវិតបានម្នាក់” ដែលមានរយៈពេលពីរឆ្នាំក្នុងគោលបំណងបង្កើនការពាក់មួកសុវត្ថិភាព ក្នុងប្រទេសកម្ពុជា។ ថវិកាបដិភាគប្រមាណជាង ៦៥០ ០០០ ដុល្លាសហរដ្ឋអាមេរិកផ្សេងទៀត ក៏ត្រូវបានផ្តល់ដោយម្ចាស់ជំនួយជាច្រើនដូចជា៖ មូលនិធិសហព័ន្ធយានយន្តអន្តរជាតិ (FIA Foundation), មូលនិធិសុវត្ថិភាពចរាចរណ៍ (Road Safety Fund), មូលនិធិក្រុមហ៊ុន UPS, មជ្ឈមណ្ឌលសហរដ្ឋអាមេរិកដើម្បីបង្ការ និងគ្រប់គ្រងជម្ងឺ (US CDC) និងពីអង្គការមូលនិធិបង្ការរបួស អាស៊ី។
ថ្ងៃនេះអង្គការមូលនិធិបង្ការ របួសអាស៊ី បានបង្ហាញជូន
និងចែករំលែកនូវពត៌មានស្តីពីសកម្មភាព សំខាន់ៗរបស់គម្រោង “មួកសុវត្ថិភាពមួយ ជួយជីវិតបានម្នាក់” នៅក្នុងសិក្ខាសាលាដៃគូថ្នាក់ជាតិនៅរាជធានីភ្នំពេញ។ សិក្ខាសាលានេះមានការចូលរួមពីដៃគូប្រមាណ
៥៥នាក់ ដែលជាមន្រ្តីមកពីស្ថាប័នរាជរដ្ឋាភិបាលពាក់ព័ន្ធនៅថ្នាក់ជាតិ និងថ្នាក់ខេត្ត
តំណាងដៃគូអភិវឌ្ឍន៍អន្តរជាតិសំខាន់ៗ និងមានវត្តមាន ឯកឧត្តម ពៅ ម៉ាលី អគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក និង ឯកឧត្តម ឧត្តមសេនីយ៍ទោ ហ៊ឹម
យ៉ាន ប្រធាននាយកដ្ឋានសណ្តាប់ធ្នាប់នៃក្រសួងមហាផ្ទៃ អញ្ជើញចូលរួមជាអធិបតី។
ឯកឧត្តម ឧត្តមសេនីយ៍ទោ ហ៊ឹម យ៉ាន ប្រធាននាយកដ្ឋានសណ្តាប់ធ្នាប់នៃក្រសួងមហាផ្ទៃបានមាន ប្រសាសន៏ថា៖ “គ្រោះថ្នាក់ចរាចរណ៍ គឺជាវិបត្តិផ្នែកសុខភាពសាធារណៈជាសកលមួយ ជាពិសេសសម្រាប់ព្រះរាជាណាចក្រកម្ពុជា ដោយគ្រោះថ្នាក់នេះបានសម្លាប់មនុស្សច្រើនជាងការស្លាប់ដែលបណ្តាល មកពីគ្រាប់មីន
ឬដោយសារជម្ងឺគ្រុនចាញ់ទៅទៀត”។ ឯកឧត្តម បានមានប្រសាសន៍បន្ថែមទៀតថា៖ “គ្រាន់តែក្នុងឆ្នាំ២០១៣ប៉ុណ្ណោះ គ្រោះថ្នាក់ចរាចរណ៍បានបង្កឱ្យមានអ្នករងរបួសរហូតដល់ទៅ ១៤,២២៧នាក់ និងបានផ្តាច់ជីវិតមនុស្សចំនួន ១,៩៥០នាក់ ដែលភាគច្រើនគឺជាយុវជន ហើយធ្វើអោយប្រទេសកម្ពុជាខាតបង់ថវិកាអស់ប្រមាណ
៣៣៧លានដុល្លា ស្មើនឹង
២.១ភាគរយផលិតផលក្នុងស្រុកសរុប”។
លោកស្រី មើរ៉ាម ស៊ីឌីគ ប្រធាននាយិកាប្រតិបតិ្តនៃអង្គការមូលនិធិបង្ការរបួស
អាស៊ី មានប្រសាសន៏ថា៖ “នៅប្រទេសកម្ពុជា ទោចក្រយានយន្ត (ម៉ូតូ) ជាមធ្យោបាយធ្វើដំណើរដ៏សំខាន់។
អ្នកបើកបរ និងអ្នករួមដំណើរតាមទោចក្រយានយន្ត គឺជាប្រភេទអ្នកប្រើប្រាស់ផ្លូវដែលមានអត្រាគ្រោះថ្នាក់ចរាចរណ៍ ខ្ពស់បំផុត។ នៅក្នុងឆ្នាំ២០១៣
ប្រមាណ ៦២ ភាគរយនៃជនរងគ្រោះដល់ស្លាប់
ដោយគ្រោះថ្នាក់ចរាចរណ៍ ទទួលរងការរងរបួសក្បាល។ ជនរងគ្រោះដែលនៅមានជីវិតប្រឈមមុខនឹងស្ថានភាពអាក្រក់បំផុត”។ លោកស្រីបានបន្ថែមទៀតថា ការរងរបួសភាគច្រើនបានបណ្តាល អោយមានពិការភាពយូរអង្វែង
ដែលតំរូវអោយមានការថែទាំ និងព្យាបាលជាប្រចាំ។ បន្ថែមពីលើការឈឺចាប់ និងទុក្ខលំបាកដែលកើតមានសម្រាប់ខ្លួនឯងផ្ទាល់ បញ្ហានេះវាបានធ្វើមានផលប៉ះពាល់ជាអវិជ្ជមានដល់គ្រួសារ ប្រព័ន្ធសុខភាពសាធារណ
និងសង្គមទាំងមូលផង។
យោងតាមការសិក្សាស្រាវជ្រាវរបស់ Cochrane Database of Systematic
Reviews បានបង្ហាញថា ការពាក់មួកសុវត្ថិភាពគឺជាមធ្យោបាយដ៏សំខាន់ និងមានប្រសិទ្ធភាពមួយក្នុងការបង្កើនការនៅរស់រានមានជីវិតដោយ វាអាចកាត់បន្ថយហានិភ័យនៃការស្លាប់រហូតដល់
៤២ភាគរយ និងការរងរបួសក្បាលរហូតដល់ ៦៩ភាគរយ។
នៅប្រទេសកម្ពុជា អ្នកបើកបរទោចក្រយានយន្តត្រូវបានច្បាប់កំណត់ឱ្យពាក់មួក សុវត្ថិភាព
ប៉ុន្តែអ្នករួមដំណើរជាមួយ គិតទាំងកុមារផងមិនទាន់ត្រូវបានតម្រូវឱ្យពាក់មួកសុវត្ថិភាពនៅឡើយទេ។ ជាអកុសល មានអ្នករួមដំណើរប្រមាណតែ
៩ភាគរយប៉ុណ្ណោះ ដែលបានពាក់មួកសុវត្ថិភាពនៅពេលធ្វើដំណើរតាមទោចក្រយានយន្ត។
លោក គឹម បញ្ញា នាយកអង្គការមូលនិធីបង្ការរបួសអាស៊ីប្រចាំប្រទេសកម្ពុជា បានមានប្រសាសន៍ ថា៖ គម្រោង “មួកសុវត្ថិភាពមួយ ជួយជីវិតបានម្នាក់” មានគោលបំណងធ្វើអោយអត្រាការពាក់មួកសុវត្ថិភាពសំរាប់អ្នករួម ដំណើរនៅតាមឃុំគោលដៅមួយចំនួននៅរាជធានីភ្នំពេញ
ខេត្តកណ្តាល និងខេត្តកំពង់ស្ពឺកើនឡើងរហូតដល់៣០ភាគរយ
ក្នុងឆ្នាំទី១ និងឈានដល់កម្រិត ៨០ភាគរយនៅចុងឆ្នាំទី២ ដែលជាលទ្ធផលវាអាចជួយបង្ការនូវការរងរបួស និងការស្លាប់ពីគ្រោះថ្នាក់ចរាចរណ៍ជាច្រើនពាន់នាក់ ហើយនឹងរួមចំណែកជួយដល់ប្រទេសកម្ពុជាពីការខាតបង់ថវិកាបានជា ច្រើនលានដុល្លាសហរដ្ឋអាមេរិច។
គោលដៅនៃគម្រោង នឹងសម្រេចបានតាមរយៈសមាសភាពសំខាន់ៗចំនួន៣ដែលបំពេញបន្ថែម
ឱ្យគ្នាទៅវិញទៅមក រួមមាន៖
១. កម្មវិធីអប់រំនៅតាមគ្រឹះស្ថានសិក្សា ដែលនឹងរួមចំណែកបង្កើតឱ្យមានអ្នកប្រើប្រាស់ផ្លូវដែលមាន សុវត្ថិភាពនៅក្នុងជំនាន់ថ្មីមួយ
២. យុទ្ធនាការអប់រំផ្សព្វផ្សាយសាធារណៈ ដែលនឹងប្រើប្រាស់នូវប្រព័ន្ធផ្សព្វផ្សាយដើម្បីផ្លាស់ប្តូរឥរិយាបទ
និង
៣. យុទ្ធនាការទាក់ទាញមតិគាំទ្រ ដែលនឹងគាំទ្រដល់ដំណើរពន្លឿនការកែសម្រួលច្បាប់ និងបទបញ្ញត្តិនានា និងការអនុវត្តច្បាប់ឱ្យកាន់តែមានប្រសិទ្ធភាព។
ឯកឧត្តម ពៅ ម៉ាលី អគ្គលេខាធិការគណៈកម្មាធិការជាតិសុវត្ថិភាព ចរាចរណ៍ផ្លូវគោកនៅកម្ពុជាបានមានប្រសាសន៏ថា៖ “ការបង្កើតឱ្យមាននិងការអនុវត្តគម្រោងដ៏សំខាន់នេះនៅ ប្រទេស កម្ពុជាគឺធ្វើឡើងក្នុងពេលវេលាដ៏សមស្របមួយ ដោយរាជរដ្ឋាភិបាលកម្ពុជាកំពុងតែបង្កើននូវកិច្ចខិតខំប្រឹងប្រែង ក្នុងការឈានទៅអនុម័តច្បាប់ស្តីពីចរាចរណ៍ផ្លូវគោកថ្មី ហើយដែលអាចនឹងអនុម័តចប់រួចរាល់នៅក្នុងពេលឆាប់ៗខាងមុខនេះ។ ច្បាប់ថ្មីនេះនឹងអនុវត្តចំពោះការពាក់មួកសុវត្ថិភាពសំរាប់អ្នក ជិះទោចក្រយានយន្តទាំងអស់
រួមទាំងកុមារផង”។
គម្រោងនេះត្រូវបានបង្កើតឡើងដោយ ផ្អែកលើគំរូនៃអន្តរាគមន៍ការងាររបស់អង្គការមូលនិធិបង្ការរបួស អាស៊ី នៅក្នុងប្រទេសវៀតណាមដែលបានជម្រុញឲ្យមានច្បាប់ស្តីពីការពាក់ មួកសុវត្ថិភាពក្នុងឆ្នាំ២០០៧។ ជាលទ្ធផលការអនុវត្តច្បាប់នេះបានជួយសង្គ្រោះជីវិតមនុស្សប្រមាណ
១ ៥៥៧នាក់ ការពារការរងរបួសបាន ២ ៤៩៥នាក់ និងកាត់បន្ថយការខាតបង់ថវិការបស់ប្រជាពលរដ្ឋ
និង រដ្ឋាភិបាលវៀតណាមបាន ៥២លានដុល្លា
ដែលត្រូវចំណាយលើការខាតបង់ការងារ ថ្លៃព្យាបាល និងតម្លៃនៃផលប្រយោជន៍ចំពោះការរួមចំណែកអភិវឌ្ឍសង្គមនៅក្នុង ឆ្នាំដំបូង។
គម្រោង “មួកសុវត្ថិភាពមួយ ជួយជីវិតបានម្នាក់” នឹងផ្តល់ប្រយោជន៍ដោយផ្ទាល់ទៅដល់ប្រជាពលរដ្ឋកម្ពុជាប្រមាណជាង
២២២ ៤៤៥នាក់ តាមរយៈការផ្តល់មួកសុវត្ថិភាព
(ដោយឥតគិតថ្លៃ និងក្នុងតម្លៃឧបត្ថម្ភ)
និងការអប់រំអំពីសុវត្ថិភាពចរាចរណ៍ ហើយប្រជាពលរដ្ឋប្រមាណ ១ ៦៣៤ ៥៥៥ នាក់ផ្សេងទៀត នឹងទទួលបានអត្ថប្រយោជន៍ដោយប្រយោលនៅក្នុងអំឡុងពេលអនុវត្តគម្រោង នេះ។ កម្មវិធី Development innovation Ventures (DIV) នៃទីភ្នាក់ងារសហរដ្ឋអាមេរិកដើម្បីការអភិវឌ្ឍន៍អន្តរជាតិបាន ផ្តល់ថវិកាចំនួន ៦៣៥ ៩៩៣ ដុល្លាសហរដ្ឋអាមេរិកក្នុងគោលបំណងជួយការពារការខាតបង់ថវិកា សំរាប់រាជរដ្ឋាភិបាលកម្ពុជាចំនួនប្រមាណ ១,៧លានដុល្លាសហរដ្ឋអាមេរិក។ ប្រសិនបើថវិកាគាំទ្រទាំងនេះ មាននិរន្តភាពក្នុងរយៈពេល ១០ឆ្នាំ មានការប៉ាន់ប្រមាណថាការវិនិយោគត្រលប់មកវិញនឹងកើនឡើងពី ២,៨ដុល្លាសហរដ្ឋអាមេរិច ទៅដល់ ១៤,៩ដុល្លាសហរដ្ឋអាមេរិក។ បើនិយាយតាមមួយបែបទៀត គឺរាល់ការចំណាយ១ដុល្លាសហរដ្ឋអាមេរិចរបស់គម្រោងនឹងជួយការពារ ការខាតបង់ថវិការហូតដល់ ១៤,៩ដុល្លាសហរដ្ឋអាមេរិក។
ការបង្កើតឡើងនូវសមាសភាពសំខាន់ៗ នៃគម្រោង នឹងធ្វើឡើងដោយផ្អែកលើលទ្ធផលនៃការរកឃើញពីការប៉ាន់ប្រមាណដែល នឹងធ្វើឡើងនៅពេលចាប់ផ្តើមដំបូងនៃគម្រោងនេះ។ ការតាមដានត្រួតពិនិត្យប្រកបដោយការយកចិត្តទុកដាក់ខ្ពស់ តាមរយៈការអនុវត្តន៍វិធីសាស្ត្រការអង្កេតការ ពាក់មួកសុវត្ថិភាពរៀងរាល់ត្រីមាស ដោយប្រើប្រាស់វិធីសាស្រ្តថតយករូបភាពជាវីដេអូ និងការវាយតំលៃនៅពាក់កណ្តាលគម្រោង រហូតដល់ចប់ការអនុវត្តន៍គម្រោង។ សកម្មភាពទាំងនេះនឹងជួយចង្អុលបង្ហាញពីការវិវឌ្ឍន៍រីកចម្រើន បញ្ហាប្រឈមនានា
និងផ្តល់លទ្ធភាពក្នុងការកែសម្រួលគម្រោង ធ្វើយ៉ាងណាឱ្យការអនុវត្តន៍គម្រោងបានកាន់តែប្រសើរឡើង ហើយនឹងរួមចំណែកដល់ការពង្រីកគម្រោងនៅពេលអនាគត។
សម្រាប់ព័ត៌មានបន្ថែម សូមទំនាក់ទំនង
លោក គឹម បញ្ញា
នាយក អង្គការមូលនិធិបង្ការរបួសអាស៊ី ប្រចាំប្រទេសកម្ពុជា
ផ្ទះលេខ ១៨បេអឺ០ ផ្លូវលេខ ៣៤៨ សង្កាត់ទូលស្វាយព្រៃទី១ ខណ្ឌចំការមន រាជធានីភ្នំពេញ
ទូរស័ព្ទលេខ៖ ៨៥៥ ១២ ៤២៤ ២៣៤; អ៊ីម៉ែល៖ pagna.kim@aipf-cambodia.org៕