អង្គការមូលនិធិបង្ការរបួស អាស៊ីជួបប្រជុំជាមួយដៃគូដើម្បីកែសម្រួលសម្ភារៈផ្សព្វផ្សាយជាមួយខ្លឹមសារអប់រំ៖ "ចាប់ពីខែមករា ឆ្នាំ២០១៦ នគរបាលចរាចរណ៍នឹងធ្វើការពិន័យ១៥០០០រៀល ចំពោះជនណាដែលមិនពាក់មួកសុវត្ថិភាព"
អង្គការមូលនិធិបង្ការរបួសអាស៊ី បានប្រារព្ធកិច្ចប្រជុំពិគ្រោះយោបល់ជាមួយដៃគូជាលើកទី២ដើម្បីកែសម្រួល រឿងអប់រំខ្នាតខ្លីសម្រាប់ផ្សព្វផ្សាយតាមទូរទស្សន៍ និងវិទ្យុដែលជាផ្នែកមួយនៃគម្រោង”មួកសុវត្ថិភាពមួយ ជួយជីវិតបានម្នាក់”។ គម្រោងនេះបានទទួលជំនួយឧបត្ថម្ភពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ Development Innovation Ventures (USAID-DIV) និងម្ចាស់ជំនួយមួយចំនួនទៀត និងមានគោលបំណងបង្កើនកំរិតនៃការពាក់មួកសុវត្ថិភាពក្នុងប្រទេសកម្ពុជា។ កិច្ចប្រជុំនេះមានបំណងប្រមូលការគាំទ្រនិងមតិយោបល់ក្នុងការកែសម្រួលសារអប់រំផ្សព្វផ្សាយនៃរឿងអប់រំខ្នាតខ្លីដែលមានខ្លឹមសារ៖ “ចាប់ពីខែមករា ឆ្នាំ២០១៦ នគរបាលចរាចរណ៍នឹងធ្វើការពិន័យ១៥០០០រៀល ចំពោះជនណាដែលមិនពាក់មួកសុវត្ថិភាព”។ រឿងអប់រំខ្នាតខ្លីនេះនឹងត្រូវចាក់ផ្សាយក្នុងយុទ្ធនាការផ្លាស់ប្តូរឥរិយាបថក្នុងឆ្នាំទី២នៃគម្រោង។
កិច្ចប្រជុំនេះមានការចូលរួមពីតំណាងក្រសួង ស្ថាប័នពាក់ព័ន្ធ និងអ្នកសារព័ត៌មានប្រមាណជាង ៣០ នាក់ដែលក្នុងនោះរួមមានវត្តមានលោកជំទាវអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកនិងតំណាងជាន់ខ្ពស់មកពីអគ្គស្នងការដ្ឋាននគរបាលជាតិ។
នៅក្នុងកិច្ចប្រជុំ សម្ភារៈអប់រំផ្សព្វផ្សាយត្រូវបានកែសម្រួលដោយយោងទៅតាមការវាយតម្លៃពាក់កណ្តាលគម្រោង
សំដៅធ្វើការផ្សព្វផ្សាយឲ្យបានកាន់តែប្រសើរឡើងអំពីការអនុវត្តច្បាប់ដែលកំណត់ឲ្យអ្នករួមដំណើរតាមម៉ូតូត្រូវតែពាក់មួកសុវត្ថិភាពដែលនឹងចាប់ផ្តើមពីថ្ងៃទី០១ខែមករាឆ្នាំ២០១៦នេះតទៅ។
អង្គការមូលនិធិបង្ការរបួស អាស៊ី បានផ្សព្វផ្សាយពីលទ្ធផលនៃការវាយតម្លៃដែលបានបង្ហាញថាទូរទស្សន៍ជាមធ្យោបាយផ្សព្វផ្សាយព័ត៌មានដ៏សំខាន់ជាងគេដើម្បីផ្លាស់ប្តូរឥរិយាបថ ហើយបន្ទាប់មកគឺផ្ទាំងប៉ាណូផ្សាយពាណិជ្ជកម្ម ស្លាកផ្សព្វផ្សាយតាមរ៉ឺម៉កម៉ូតូកង់បី និងវិទ្យុ។ អ្នកតបសម្ភាសន៍ភាគច្រើនបានគាំទ្ររឿងអប់រំខ្នាតខ្លីតាមទូរទស្សន៍ដែលផលិតដោយអង្គការមូលនិធិបង្ការរបួស អាស៊ី ថាជាមធ្យោបាយដ៏មានប្រសិទ្ធភាពខ្ពស់ជាងគេក្នុងចំណោមមធ្យោបាយផ្សេងទៀតនៃយុទ្ធនាការផ្លាស់ប្តូរឥរិយាបថ ពីព្រោះកំរិតនៃការគ្រប ដណ្តប់របស់ទូរទស្សន៍មានលក្ខណៈទូលំទូលាយ។
លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃគណ: កម្មាធិការជាតិសុវត្ថិភាពចរាចរណ៍ផ្លូវគោក បានមានប្រសាសន៍ថា “យើងខ្ញុំមានសេចក្តីរំភើបរីករាយ និងអបអរសាទរចំពោះលទ្ធផលជាវិជ្ជមានដែលបានមកពីយុទ្ធនាការលើកកម្ពស់ឥរិយាបថក្នុងការពាក់មួកសុវត្ថិភាពទាំងអ្នកបើកបរ និងអ្នករួមដំណើរ រួមទាំងកុមារអាយុចាប់ពី៣ឆ្នាំឡើងទៅ ដែលបង្ហាញតាមរយៈការវាយតម្លៃពាក់កណ្តាលគម្រោងអនុវត្តដោយអង្គការមូលនិធិបង្ការរបួស អាស៊ីនិងដៃគូពាក់ព័ន្ធ ដែលបានមកពីការប្រមូលផ្តុំមតិយោបល់របស់សហគមន៍ក្នុងខេត្តគោលដៅ”។ លោកជំទាវ បានមានប្រសាសន៍បន្ថែមថា “មតិយោបល់នេះមានសារៈសំខាន់យ៉ាងខ្លាំងដើម្បីកែលម្អសារអប់រំឲ្យមានប្រសិទ្ធភាពកាន់តែខ្ពស់សំដៅជំរុញឲ្យអ្នកធ្វើដំណើរតាមម៉ូតូយកចិត្តទុកដាក់ពាក់មួកសុវត្ថិភាពជាចាំបាច់ទាំងអស់គ្នារួមទាំងកុមារ ទោះធ្វើដំណើរទៅទីជិតឬឆ្ងាយ និងទាំងពេលយប់ និងពេលថ្ងៃស្របតាមច្បាប់ចរាចរណ៍ ដើម្បីការពារអាយុជីវិតមនុស្សជាទីស្រឡាញ់ ក៏ដូចជាទ្រព្យសម្បត្តិរបស់គ្រួសារ និងសង្គមជាតិកម្ពុជាទាំងមូល”។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជា បានមានប្រសាសន៍ថា៖ “តាមការវាយតម្លៃបានបង្ហាញថា ៩៤% នៃប្រជាពលរដ្ឋបានទស្សនារឿងអប់រំខ្នាតខ្លីតាមទូរទស្សន៍នេះ ហើយ ៨៨% នៃអ្នកតបសម្ភាសន៍បាននិយាយថាពួកគេបានចងចាំសារនៃយុទ្ធនាការ។ លោកបានបន្ថែមថា៖ “ការវាយតម្លៃក៏បានរកឃើញពីប្រសិទ្ធភាពនៃខ្លឹមសារសម្ភារៈអប់រំផ្សព្វផ្សាយដែលបានប្រើប្រាស់ក្នុងយុទ្ធនាការនេះដែរ”។
ឯកឧត្តម ឧត្តមសេនីយ៍ទោ ទី ឡុង អនុប្រធាននាយកដ្ឋាននគរបាលចរាចរណ៍និងសណ្តាប់ធ្នាប់ សាធារណៈ បានមានប្រសាសន៍ថា “ការផ្សព្វផ្សាយដល់អ្នកបើកបរនិងអ្នករួមដំណើរតាមម៉ូតូពីច្បាប់ដែលកំណត់ឲ្យអ្នករួមដំណើរត្រូវតែពាក់មួកសុវត្ថិភាពគឺជាការចាំបាច់ណាស់សម្រាប់គាំទ្រដល់ការអនុវត្តច្បាប់ឲ្យមានប្រសិទ្ធភាព។ ខ្ញុំសប្បាយចិត្តណាស់ដោយបានដឹងថាមានការបន្តអនុវត្តយុទ្ធនាការដែលជំរុញឲ្យមានឥរិយាបថប្រកបដោយសុវត្ថិភាពដើម្បីសង្គ្រោះជីវិតមនុស្ស”៕
######
