ច្បាប់ដែលកំណត់ឲ្យអ្នករួមដំណើរតាមទោចក្រយានយន្ត ត្រូវពាក់មួកសុវត្ថិភាព អាចការពារការខាតបង់ថវិកាបានជិត ១០០លានដុល្លាសហរដ្ឋអាមេរិក
៖នៅថ្ងៃទី៧ ខែឧសភា អង្គការមូលនិធិបង្ការរបួស អាស៊ី បានផ្សព្វផ្សាយនូវលទ្ធផលនៃការវិភាគមួយស្តីពី “ការរួមចំណែកការពារការខាតបង់ថវិកា និងការជួយសង្រ្គោះជីវិតមនុស្សពីការអនុម័ត និងអនុវត្តច្បាប់កំណត់ឲ្យអ្នករួមដំណើរតាមទោចក្រយានយន្ត គិតទាំងកុមារ ត្រូវពាក់មួកសុវត្ថិភាព”។ ការចេញផ្សាយនូវលទ្ធផលនៃការវិភាគនេះ គឺជាផ្នែកដ៏សំខាន់នៃកិច្ចខិតខំប្រឹងប្រែងរួមគ្នារបស់អង្គការ -ស្ថាប័ននានាធ្វើឡើងដើម្បីជម្រុញលើកទឹកចិត្តដល់រាជរដ្ឋាភិ បាលកម្ពុជាក្នុងការពន្លឿនការអនុម័ត និងអនុវត្តឲ្យបានឆាប់រហ័សនូវសេចក្តីព្រាងច្បាប់ស្តីពីចរាចរណ៍ ផ្លូវគោក(ថ្មី) ដែលក្នុងនោះក៏បានតម្រូវឲ្យអ្នករួមដំណើរតាមទោចក្រយានយន្ត គិតទាំងកុមារ ត្រូវតែពាក់មួកសុវត្ថិភាព។
ប្រសិនបើមានការអនុម័តច្បាប់ដែលមានចែងអំពីការពាក់មួកសុវត្ថិ ភាពសម្រាប់អ្នករួមដំណើរតាមទោចក្រយានយន្តក្នុងឆ្នាំ២០១៤ ហើយមានការអនុវត្តការរឹតបន្តឹងច្បាប់នេះនាដើមឆ្នាំ២០១៥នោះ អត្រា នៃការពាក់មួកសុវត្ថិភាពក្នុងចំណោមអ្នករួមដំណើរតាមទោចក្រយាន យន្ត
ដែលនាពេលបច្ចុប្បន្ននេះមានត្រឹម ៧ភាគរយប៉ុណ្ណោះ ត្រូវបានប៉ាន់ស្មានថានឹងមានការកើនឡើងរហូតដល់ ៥៥ភាគរយក្នុងឆ្នាំ ២០១៥
ហើយនឹងបន្តកើនឡើងប្រមាណ ៥ភាគរយ ជារៀងរាល់ឆ្នាំបន្តបន្ទាប់រហូតឈានដល់ ៨០ភាគរយនៅត្រឹមឆ្នាំ២០២០។ ជាលទ្ធផល យើងអាចសង្រ្គោះជីវិតមនុស្សពីការស្លាប់បានប្រមាណ
៥៦១នាក់ និងបញ្ជៀសការរងរបួសក្បាលធ្ងន់ធ្ងរបានដល់ទៅ
១០,៥៧២នាក់ ហើយការពារការខាតបង់ថវិកា ប្រមាណ ៩៨,៦១៨,៤២២ ដុល្លាសហរដ្ឋអាមេរិកចាប់ពីឆ្នាំ២០០៥
ដល់ឆ្នាំ២០២០។
លោក គឹម បញ្ញា
នាយកអង្គការមូលនិធិបង្ការរបួស អាស៊ី ប្រចាំប្រទេសកម្ពុជា បានមានប្រសាសន៍ថា៖ “ការវិភាគនេះបានបង្ហាញយ៉ាងច្បាស់លាស់ថា នេះគឺជាមូលហេតុដែលប្រទេសកម្ពុជាត្រូវការជាបន្ទាន់នូវច្បាប់ ស្តីពីចរាចរណ៍ផ្លូវគោក (ថ្មី)”។ លោកនាយកបានបន្ថែមទៀតថា៖ “យើងខ្ញុំសូមជម្រុញលើកទឹកចិត្តដល់ភាគីពាក់ព័ន្ធ ដៃគូដែលបំពេញការងារសុវត្ថិភាពចរាចរណ៍ទាំងអស់ និងប្រព័ន្ធផ្សព្វផ្សាយនានា សូមប្រើប្រាស់នូវលទ្ធផលនៃការវិភាគស្រាវជ្រាវនេះនៅក្នុងកិច្ច ខិតខំប្រឹងប្រែងរបស់ខ្លួនដើម្បីទាក់ទាញមតិគាំទ្រ និងលើកទឹកចិត្តដល់រាជរដ្ឋាភិបាលឲ្យធ្វើការអនុម័ត និងអនុវត្តការរឹតបន្តឹងច្បាប់ចរាចរណ៍ផ្លូវគោក
(ថ្មី) ឲ្យបានឆាប់រហ័សសំដៅឈានទៅសម្រេចគោលដៅក្នុងការជម្រុញឲ្យមានការ ពាក់មួកសុវត្ថិភាពដល់ទៅ
៨០ភាគរយត្រឹមឆ្នាំ២០២០”។
ឯកឧត្តម ពៅ ម៉ាលី អគ្គលេខាធិការ គណៈកម្មាធិការជាតិសុវត្ថិភាពចរាចរណ៍ផ្លូវគោក បានមានប្រសាសន៍ថា៖ “លទ្ធផលនៃការវិភាគនេះបញ្ជាក់ឲ្យឃើញកាន់តែច្បាស់ថា រាជរដ្ឋាភិបាលកម្ពុជាកំពុងតែបំពេញនូវកិច្ចការសង្រ្គោះជីវិតដ៏ ត្រឹមត្រូវ តាមរយៈការកំណត់ឲ្យអ្នករួមដំណើរតាមទោចក្រយានយន្តគិតទាំងកុមារ ត្រូវតែពាក់មួកសុវត្ថិភាពនៅក្នុងសេចក្តីព្រាងច្បាប់ស្តីពី ចរាចរណ៍ផ្លូវគោក (ថ្មី)”។ ឯកឧត្តមអគ្គលេខាធិការ បានមានប្រសាសន៍បន្ថែមទៀតថា៖ “នាពេលបច្ចុប្បន្ននេះ សេចក្តីព្រាងច្បាប់ ស្តីពីចរាចរណ៍ផ្លូវគោកគឺកំពុងមានដំណើរការរីកចំរើនទៅមុខ ហើយយើងក៏កំពុងតែបង្កើននូវកិច្ចខិតខំប្រឹងប្រែងក្នុងក្តី សង្ឃឹមយ៉ាងមុតមាំថា សេចក្តីព្រាងច្បាប់នេះនឹងទទូលបានការអនុម័ត និងអនុវត្តយ៉ាងឆាប់រហ័ស
សំដៅឈានទៅសម្រេចតាមគោលដៅរបស់យើង គឺជួយសង្គ្រោះជីវិតមនុស្សឲ្យបានជាច្រើនពាន់នាក់ក្នុងអំឡុងពេល នៃទសវត្សរ៍សុវត្ថិភាពចរាចរណ៍ផ្លូវគោកឆ្នាំ២០១១-២០២០”។
សូមបញ្ជាក់ថា
រូបមន្តដែលអង្គការមូលនិធិបង្ការរបួស អាស៊ី ប្រើប្រាស់សម្រាប់ការគណនាអំពីចំនួនជីវិតមនុស្សដែលអាចសង្គ្រោះ ជីវិតបាន
និងការការពារការខាតបង់ថវិកា គឺយកលំនាំតាមបណ្តារូបមន្តដែលត្រូវបានប្រើប្រាស់ក្នុងផ្នែក សុខភាពសាធារណៈដោយមជ្ឈមណ្ឌលបង្ការ និងគ្រប់គ្រងជម្ងឺសហរដ្ឋអាមេរិក
(US CDC)។ ការសិក្សាស្រាវជ្រាវនេះផ្តល់ការគាំទ្រដល់កិច្ចខិតខំរបស់អង្គ ការមូលនិធិបង្ការរបួស អាស៊ី ដើម្បីបន្តរួមចំណែកលើកកម្ពស់ការពាក់មួកសុវត្ថិភាពសម្រាប់អ្នក រួមដំណើរតាមទោចក្រយានយន្ត
គិតទាំងកុមារ ក្នុងរយៈពេលពីរឆ្នាំខាងមុខបន្ថែមទៀតដោយមានការគាំទ្រថវិកាពី ទីភ្នាក់ងារអភិវឌ្ឍន៍ និងមូលនិធិអន្តរជាតិដ៏សប្បុរសមួយចំនួន៕