លោក គ្រូ អ្នកគ្រូនៅសាលាបឋមសិក្សា អនុវត្ត បានចូលរួមក្នុងវគ្គបណ្តុះបណ្តាលមួយស្តីពី សុវត្ថិភាពចរាចរណ៍ ក្រោមគម្រោង មួកសុវត្ថិភាពសម្រាប់ក្រុមគ្រួសារ ដោយទទួលបានការឧបត្ថម្ភ ពីក្រុមហ៊ុន ម៉េនូឡាយហ្វ៍ (ខេមបូឌា) ភីអិលស៊ី

កាលពីថ្ងៃទី ១៤ ខែ តុលា ឆ្នាំ ២០១៤ លោកគ្រូ អ្នកគ្រូសរុបជាង ៣០នាក់ បានចូលរួមក្នុងវគ្គបណ្តុះបណ្តាលដែលមានរយៈពេល កន្លះថ្ងៃ ក្រោមប្រធានបទ សារៈសំខាន់នៃការពាក់មួកសុវត្ថិភាពឲ្យបានត្រឹមត្រូវ រួមទាំងការស្វែងយល់ពីស្ថានភាពសុវត្ថិភាពចរាចរណ៍ក្នុងប្រទេស កម្ពុជា។ ការពិភាក្សាជាច្រើនត្រូវបានលើកឡើងយកមក ដោយផ្អែកលើស្ថិតិនៃគ្រោះថ្នាក់ចរាចរណ៍ និងបច្ចេកទេសនៃការពាក់មួកសុវត្ថិភាពបានត្រឹមត្រូវ។ នាឱកាសនោះ លោកគ្រូ/អ្នកគ្រូ ក៏បានចែករំលែកនូវបទពិសោធន៍ផ្ទាល់ខ្លួនអំពីគ្រោះថ្នាក់ ចរាចរណ៍ និងពិភាក្សាស្វែងរកនូវដំណោះស្រាយដ៏សមស្របដើម្បីជម្រុញឲ្យ កុមារពាក់មួកសុវត្ថិភាពគ្រប់ពេលធ្វើដំណើរ ទៅនិងមកសាលារៀន។

លើសពីនេះទៅទៀត នៅក្នុងសិក្ខាសាលាបណ្តុះបណ្តាលនេះ លោកគ្រូ អ្នកគ្រូបានចូលរួមបង្កើតផែនការបង្រៀនស្តីពី ការពាក់មួកសុវត្ថិភាព និង សុវត្ថិភាពចរាចរណ៍ទូទៅក្នុងម៉ោងបណ្តុះគ្រូបង្គោល ។ ព្រោះនាឆ្នាំសិក្សាខាងមុខដែលនឹងឈានមកដល់ លោកគ្រូ អ្នកគ្រូ នឹងអនុវត្តនូវសកម្មភាពនៃការបង្រៀនតាមផែនការ ជាលំដាប់លំដោយជាមួយនឹងលោកគ្រូ អ្នកគ្រូ ដ៏ទៃទៀតរួមជាមួយនឹងសិស្សានុសិស្ស ដើម្បីពង្រឹង និងចែករំលែកបន្ថែមពីព័ត៌មាននៃការពាក់មួកសុវត្ថិភាព និងសុវត្ថិភាពចរាចរណ៍ដែលរៀនរួចកន្លងមក។

ក្រោមគម្រោង មួកសុវត្ថិភាពសម្រាប់ក្រុមគ្រួសារ អង្គការមូលនិធិបង្ការរបួស អាស៊ីទន្ទឹងរងចាំទទួលនូវបច្ចេកទេសថ្មីៗ ដែលមានភាពច្នៃប្រឌិត ហើយត្រូវបានអនុវត្តដោយលោកគ្រូ អ្នកគ្រូនៅសាលាបឋមសិក្សា អនុវត្ត ក្នុងការអប់រំបុគ្គលិក និងសិស្សានុសិស្សអំពីសារៈសំខាន់នៃការពាក់មួកសុវត្ថិភាព និងឥរិយាបថល្អនៃការប្រើប្រាស់ផ្លូវ ។