យើងសូមកោតសរសើរចំពោះការប្តេជ្ញាចិត្ត និងសមិទ្ធផលសម្រេចបានរបស់រាជរដ្ឋាភិបាល និងស្ថាប័ននីតិបញ្ញតិ្ត ក្នុងការលើកកម្ពស់សុវត្ថិភាពចរាចរណ៍ និងបង្កើនការពាក់មួកសុវត្ថិភាពក្នុងចំណោមអ្នកប្រើប្រាស់ផ្លូវនៅក្នុងប្រទេសកម្ពុជា។ ប៉ុន្តែយើងខ្ញុំកត់សំគាល់ឃើញថានៅមានកិច្ចការជាច្រើនដែលត្រូវយកចិត្តទុកដាក់អនុវត្តក្នុងវិស័យនេះ។ យើងខ្ញុំសូមទទួចឲ្យរាជរដ្ឋាភិបាល ផ្តល់អាទិភាពខ្ពស់ចំពោះការងារសុវត្ថិភាពនៅក្នុងរបៀបវារៈនយោបាយរបស់ខ្លួន។ យើងសូមអំពាវនាវដោយទទូចដល់ស្ថាប័ននិតិប្រតិបត្តិ និងស្ថាប័ននិតិបញ្ញត្តិសូមបង្កើននូវវិធានការភ្លាមៗបន្ថែមទៀត ដូចដែលបានស្នើឡើងខាងក្រោមនេះ ៖
- សូមអនុម័តគោលនយោបាយជាតិសុវត្ថិភាពចរាចរណ៍ផ្លូវគោក និងផែនការសកម្មភាពជាតិសុវត្ថិភាពចរាចរណ៍ផ្លូវគោករយៈពេល ១០ឆ្នាំដែលក្នុងនោះគោលដៅដ៏មានសារៈសំខាន់មួយគឺបង្កើនការពាក់មួក សុវត្ថិភាពឲ្យបាន១០០% ក្នុងចំណោមអ្នកធ្វើដំណើរតាមទោចក្រយានយន្ត។
- សូមពិនិត្យលទ្ធភាពពន្លឿនដំណើរការពិនិត្យ និងអនុម័តលើសេចក្តីព្រាងច្បាប់ស្តីពីចរាចរណ៍ផ្លូវគោក (ថ្មី) ដែលក្នុងនោះក៏បានកំណត់ពីភាពចាំបាច់ឲ្យអ្នករួមដំណើរតាមទោចក្រយានយន្តគិតទាំងកុមារត្រូវតែពាក់មួកសុវត្ថិភាពរាល់ពេលធ្វើដំណើរនៅលើដងផ្លូវ។
- ពង្រឹងគុណភាពសាលាបង្រៀនបើកបរ និងការប្រឡងយកប័ណ្ណបើកបរ និងជម្រុញឲ្យបានឆាប់សម្រាប់នីតិវិធីដកពិន្ទុលើប័ណ្ណបើកបរ។
- ផ្តល់សេវាសង្រ្គោះបន្ទាន់ និងសង្រ្គោះបឋមផ្នែកវេជ្ជសាស្ត្រឲ្យបានទាន់ពេលវេលា និងមានប្រសិទ្ធភាពខ្ពស់ និងសមធម៌ដល់ជនរងគ្រោះដោយគ្រោះថ្នាក់ចរាចរណ៍។
- បង្កើនការអប់រំ និងផ្សព្វផ្សាយជាសាធារណៈឲ្យបានកាន់តែទូលំទូលាយអំពីសុវត្ថិភាពចរាចរណ៌ផ្លូវគោក និងច្បាប់ស្តីពីចរាចរណ៍ផ្លូវគោកនៅតាមសាលារៀន សាកលវិទ្យាល័យ និងសហគមន៍ ជាពិសេសនៅតាមតំបន់ដែលនៅជាប់ផ្លូវជាតិ និងដែលប្រឈមនឹងគ្រោះថ្នាក់ខ្ពស់។
- ផ្សព្វផ្សាយ និងដាក់បញ្ចូលនូវគោលនយោបាយ និងផែនការសកម្មភាពសុវត្ថិភាពចរាចរណ៍ផ្លូវគោកទៅក្នុងផែនការអភិវឌ្ឍន៍ថ្នាក់មូលដ្ឋានដោយផ្តល់នូវធនធានគ្រប់គ្រាន់សម្រាប់ការអនុវត្តផងដែរ។
- ផ្តល់នូវការគាំទ្រផ្នែកហិរញវត្ថុ សម្ភារៈបច្ចេកទេស និងការបណ្តុះបណ្តាលពាក់ព័ន្ធនឹងការអនុវត្តច្បាប់ដល់មន្ត្រីនគរបាលចរាចរណ៍ផ្លូវគោក។
- សូមពង្រឹងការអនុវត្តច្បាប់ស្តីពីចរាចរណ៍ផ្លូវគោកដែលនៅជាធរមាន និងផ្សព្វផ្សាយឲ្យបានទូលំទូលាយ និងអនុវត្តច្បាប់ឲ្យបានកាន់តែហ្មឹងម៉ាត់នៅពេលសេចក្តីព្រាងច្បាប់ស្តីពីចរាចរណ៍ផ្លូវគោក (ថ្មី) ចូលជាធរមាន។
ការសន្យា
ខ្ញុំគាំទ្រឲ្យមានការអនុវត្តច្បាប់ដែលកំណត់ឲ្យកុមារពាក់មួកសុវត្ថិភាពយ៉ាងឆាប់បំផុត
1019
នាក់
